İsrail ükümeti «Hamas» (ABD ve AB tarafından terror teşkilâtı olaraq tanılğan) ile Gazzede ateş toqtatıluvı ve esirlerni azat etüv aqqında añlaşmağa qoltuttı.
Añlaşmağa 24 insan rey berdi, sekiz nazir qarşı çıqtı. Toplaşuv yedi saat devam etti. Añlaşmağa qarşı rey bergenler arasında eki ultrasağ nazir bar edi: milliy telükesizlik naziri İtamar Ben-Gvir ve maliye naziri Betsalel Smotriç ve «Likud» ükümran firqasınıñ eki azası.
Bundan evel «Hamasnen» olğan añlaşmanın İsrailniñ telükesizlik şurası tarafından tasdıqlandı. Añlaşma şartlarına köre, ateşkes yanvarniñ 19-ndan başlay. Aynı şu künü «Hamas» esirliginden üç reine azat etilmeli.
Añlaşmanıñ birinci basamağı 42 kün devam etmesi beklenile. Bu vaqıt devamında «Hamas» 33 reineni, İsrail ise yüzlernen filistinli esirni azat etmeli: 30 – vatandaş reine, 50 – arbiy. Bundan ğayrı, İsrail ordusı Gazzeniñ insanlar toplu yaşağan yerlerinden yavaş-yavaş çekilmek kerek.
Añlaşmanıñ ekinci basamağı vaqtında İsrail ordusı bütünley çıqmalı, amma taraflar şartlar aqqında daa kelişmediler.
İsrail Gazzede «Hamasnıñ» 2023 senesi oktâbrniñ 7-nde memleket cenübine qarşı ücümine cevap olaraq arbiy operatsiyanı keçire. O vaqıt 1200-den çoq barışıqsever sakin öldürildi, 250-den çoq insan esir alındı ve Gazzege çıqarıldı. Bu insanlarnıñ bir qısmı deñişüv vaqtında azat etildi. Şimdi, İsrail mahsus hızmetleriniñ esaplarına köre, «Hamas» 99 reineni tuta, bir qısmı ölgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.