İsrail mudafaa küçleri (TSAHAL) keçken gece Lübnannıñ cenübindeki «Hizbullahnıñ» obyektleri ve infrastrukturasına qarşı «doğru istihbarat malümatına esaslanğan sıñırlı qara reydlerini» başlattı, dep ilân etti. Bu aqta İsrail ordusı komandanlığınıñ beyanatında qayd etile.
Bu reydlerniñ nişanları «sıñırğa yaqın köylerde yerleşe, olar İsrailniñ mesken yerleri içün doğrudan-doğru telüke doğura», – dep iddia ete komandanlıq.
Qara operatsiyadan evel İsrail ordusı tarafından ABD ve Avropa Birliginde terrorist olaraq tanılğan «Hizbullah» gruppasınen bağlı Lübnandaki nişanlarğa qarşı kütleviy ava ücümleri yapıldı. Gruppirovka İsrailge raketa ücümlerini kerçekleştirdi, bunıñ neticesinde on biñlernen israilli memleketniñ şimalindeki mesken yerlerde evlerinden qaçmağa mecbur oldı.
«New York Times» gazetasınıñ malümatına köre, ücümcilerniñ küçü kommandolarnıñ küçük gruppalarından ibaret. Kerek olsa, soñki künlerde Lübnan sıñırı yanında toplanğan daa büyük kontingentlerni Lübnanğa ketire bileler.
Operatsiya planı bazarertesi aqşamı keç saatlarda İsrail ükümeti toplaşuvında tasdıqlandı. Bundan evel Lübnandaki bir sıra ava ücümi neticesinde İsrail küçleri «Hizbullahnıñ» bir sıra yetekçi vekillerini, şu cümleden gruppanıñ yolbaşçısı Hasan Nasrullahnı öldürdi. Lübnan akimiyeti ücümlerde yüzlernen tınç sakinlerniñ de öldürilgenini bildirdi.
Gece İsrailniñ Suriyeniñ paytahtı Dimaşqqa qarşı ava ücümi aqqında haber keldi. Suriye devlet matbuatınıñ malümatına köre, üç adam elâk oldı, 9 adam yaralandı. Ava areketiniñ maqsadı tam olaraq ne olğanı daa belli degil. İsrail komandanlığı ise memleketniñ yalısından bir qaç on kilometr uzaqlıqta Aq deñiz üstünde dronnıñ tutulğanı aqqında haber etti. Tafsilâtları belli degil.
CNN telekanalı İsrailniñ resmiy menbalarına esaslanıp, İsrail «Lübnannıñ cenübiy regionlarını uzun müddetli işğal etmege planlaştırmağanını» bildirdi, amma İsrail akimiyeti şimdiki areketniñ devamlılığını daa bildirmedi.
Aynı vaqıtta İsrail Gazzede bir çoq memlekette terrorist olaraq tanılğan «Hamas» gruppasına qarşı arbiy areketlerini devam ete. Olar 2023 senesi oktâbrniñ 7-nde İsrailge ücüm yaptı, onıñ devamında memleketniñ biñden ziyade vatandaşı öldürildi, yüzlernen adam esir alındı. İsrailniñ Gazzedeki cevap areketi vaqtında, yerli akimiyetniñ malümatına köre, biñlernen filistinli öldürildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
