Oktâbrniñ 26-nda saba İsrail İrandaki arbiy obyektlerge bir sıra darbe endirdi.
İsrail ordusınıñ bildirgenine köre, bu bir yıldan berli İran ve ittifaqdaşlarınıñ İsrailge yapılğan ücümlerine cevaptır.
«Biz İrandaki arbiy obyektlerge qarşı maqsatlı ve doğru ücümler yaptıq ve İsrail devletine olğan telükege mania oldıq», – dep bir qaç saattan soñ TSAHAL vekili Daniel Hagari ücümniñ soñunı ilân etti.
TSAHAL malümatına köre, İsrail uçaqları İran İsrailge ücüm etmek içün qullanğan raketalar çıqarılğan yerlerge, «yer-ava» raketa sistemalarına ve İsrailniñ İranğa qarşı ücümlerine qarşı çıqqan diger ava nişanlarına ücüm ettiler.
Hagari, İran cevap berse, İsrail kene qarşılıq kösterecek, dep tenbiledi. İrannıñ «Tasnim» şahsiy agentligi menbasına esaslanıp, İran İsrailniñ istilâsına ve er angi diger istilâğa cevap bermege azır olğanını yaza.
İrannıñ ava mudafaa müessisesi İsrail Tehran, Huzestan ve İlam vilâyetlerindeki arbiy obyektlerge ücüm etti, dep tasdıqladı. Olarnıñ bazıları zarar kördi, şimdi onıñ miqdarına baqıla, dep bildire «Tasnim» agentligi. İsfahan, Razaviy Horasan ve Kurdistan vilâyetlerinde de patlavlar eşitildi, dep haber etile içtimaiy ağlarda.
Suriye de ücümge oğradı, dep yaza Suriyeniñ SANA devlet agentligi. Ava mudafaa sistemaları Suriyeniñ cenübiy ve merkeziy regionlarında bir qaç raketanı urıp tüşürdi – ücümniñ neticeleri baqıla, dep bildire suriyelilerniñ beyanatını Al-Monitor mustaqil agentligi. İsrail Suriyege qarşı iç bir ücüm aqqında haber etmedi, amma yıllar devamında bu memlekette İrannen bağlı yerlerni nişan ala.
The Wall Street Journal malümatına köre, İsrail ava ücümleri başlanmazdan evel ABDge haber etti. ABD İrannı İsrailniñ ücümine cevap bermemege çağıra. «İran kene cevap bermege qarar berse, biz azır olacaqmız – ve kene de İran içün aqibetler olacaq. Lâkin biz böyle olmasını istemeymiz», – dep qayd etti ABD prezidentiniñ memuriyetinden memur, dep bildire WSJ agentligi. «Bu İsrail ve İran arasında doğrudan-doğru ateşniñ soñu olmalı», – dep qoştı o.
İsrailniñ ava ücümleri, ABD ve İsrail tarafından terroristik gruppalar olaraq tanılğan «Hamas» ve «Hizbullanıñ» yüksek dereceli azalarınıñ İsrail tarafından öldürilmesine cevap olğan ava ücümleri eki devlet arasında büyük cenkke ketire bile, dep qorqa ekspertler. Berilgen malümatqa köre, İsrailniñ cevabınen bağlı muzakereler vaqtında ABD İsrailni İrannıñ özek ve cermay obyektlerini bombalamamağa çağırğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
