İsrail mudafaa ordusı cumaertesine keçer gecesi Gazzede HAMAS ve infrastrukturasınıñ yoq etilüvine yönelgen qara areketlerni «bayağı kenişletecek». Bu aqta TSAHAL matbuat hızmetiniñ vekili David Hagari bildirdi.
Cuma kününe keçer gecesi İsrail mudafaa ordusınıñ bölükleri HAMAS obyektlerine qarşı darbe endirip reyd keçirdi. Berilgen malümatqa köre, «Ğarbiy Han-Yunis» batalyonınıñ komandanı Madhat Mubaşer öldürildi, İsrail deñiz piyadesi ise HAMASnıñ arbiy-deñiz quvetleriniñ komandan noqtalarını yoq etti. HAMAS ise İsrailniñ deñizden yapqan ücümini keri qaytardı.
Cuma aqşamı Gazzege qarşı ateşler quvetleşti. Şimaliy tarafından küçlü patlavlar aqqında haber etile. Al Arabiya telekanalı bu ücümni cenk başlağanından eñ küçlü dep adlandırdı. Gazzede cep telefon bağı ve internet problemleri bar. İsrail komandanlığı Gazze sakinlerine muracaat etip, cenüpke, Mısır sıñırına tahliye olmağa tevsiye etti.
HAMAS İsrailniñ cenübiy ve merkeziy qısmına ateş etmege devam etti. Tel-Avivde raketa dört qatlı mesken evge ücüm etti, üç insan yaralandı. Ava sirenaları memleketniñ cenübinde bir çoq şeerde, Aşdod ve Aşkelonda oldı.
The New York Times İsrail Nazirler şurasındaki menbalarına esaslanıp, qara operatsiyanıñ planı azır, amma baş nazir Binyamin Netanyahu onıñ imzalamasını uzattı, çünki çoq qurban olsa, populârlığı eksilir, dep qorqa edi, dep bildirgen edi.
HAMAS oktâbrniñ 7-nde ücüm neticesinde zapt etilgen 200-den çoq reine tutmağa devam ete. Aralarında em israilliler, em diger memleketlerniñ vatandaşları bar. Tahminen 30-ı bala.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
