39 insan İspaniyanıñ cenübinde Andalusiyada Adamus şeeriniñ yaqınlarında eki süratlı trenniñ tapışuvı neticesinde 39 insan elâk oldı, dep haber ete El País.
Neşirniñ malümatına köre, daa eñ az 73 insan yaralandı, 24-ü ciddiy yaralar aldı. Bundan evel elâk olğan 21 kişi ve yaralanğan 75 insan aqqında haber etilgen eddi.
Qaza yanvarniñ 18-nde aqşam oldı. Kütleviy haber vastalarınıñ malümatına köre, Malagadan Madridke ketken Iryo şirketiniñ treni relslerden çıqtı, soñki eki vagonı (altıncısından sekizincisine qadar) Alvia şirketiniñ treni (Renfe) ketken qomşu yolğa avdarıldı. O, Madridden Uelvke kete edi. Çatışma vaqtında tren saatta 200 kilometr süratınen kete edi. Elâk olğanlardan biri Alvia treniniñ maşinistidir. Trenniñ relslerden çıquv sebebi şimdilik belli degil.
"Iryo treni yañı sayıla ve yollar da tamir etilgen edi. Bu yerde yol deñiştirüv işleri mayısta yekünlendi. Qaza pek hucur; tegiz yolda oldı. Mesleat keçirgen ekspertlerimiz şaştı", – dep bildirdi naqliyat naziri Oskar Puente. O, elâk olğanlarnıñ sayısı arta bile, dep tahmin etti.
Madrid ve Andalusiya arasında tren areketi toqtatıldı.