Rusiye akimiyeti martnıñ 14-ne işğal etilgen Qırımnıñ İslâm-Terek rayonınıñ Küçük Keleçi (Orehovka) köyünde Rusiye Federatsiyası arbiyleriniñ talimleri keçirilecek, dep ilân etti. Bu haber rayonnıñ Rusiye memuriyetiniñ matbuat hızmeti tarafından derc etildi.
Berilgen malümatqa köre, Klubnaya soqağında yerli saatnen 10:00-dan 18:00-ğa qadar areket sıñırlanacaq.
«Talimler keçirilgende yol-patrul hızmetiniñ hadimleri köyniñ kiriş ve çıqışlarında naqliyat vastalarınıñ areketini sıñırlaycaq. Polis hadimleri telâşlanmamağa ve uquq qoruyıcılarnıñ işine añlayışlı yanaşmağa rica ete», – dep aytıla haberde.
Rusiye kontrolindeki Qırım yolbaşçısı Sergey Aksenov fevralniñ 22-nde Bağçasaray ve Saq rayonlarında «BARS-Krım» Rusiye bölükleriniñ talimleri keçirilecek, dep bildirgen edi.
Qırımtatar resurs merkezi esaplağanına köre, 2024 senesi Rusiye Qırımda eñ az 124 arbiy talim keçirdi. Keçken yıllarğa baqqanda büyük artış bar: 2023 senesi 40 talim, 2022 senesi 20 talim, 2021 senesi 44 talim keçirilgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
