İşğalden azat etilgen Donetsk, Harkiv ve Herson vilâyetlerinde elâk olğanlarnıñ 1077 cesedi tapıldı, dep bildirdi Ukrayına İç işler naziri Denis Monastırskıy.
«Vilâyetlerde tapılğan cesedlernen bağlı bazı raqamlarnı ayta bilem. Donetsk vilâyeti aqqında aytsaq, işğalden azat etilgen topraqlarda 268 ceset taptıq, 175-iniñ kimligi belli, yani yarısından ziyadesi. Harkiv viyaletinde 765 ceset, 453-üniñ kimligi belli. Herson vilâyetinde 55 ceset tapıldı, 3-üniñ kim olğanı belli», – dedi Monastırskıy.
Monastırskiyniñ aytqanına köre, ekspertizalar tek DNA talili vastasınen keçirilgeni içün kimliklerini belgilemek zor ola.
«Körünişlerinden kige oşağanlarını añlamaq artıq immkânsız, şu sebepten bu cesedlerniñ DNAsı alına, ğayıp olğanlarnıñ tuvğanlarından haber alına, soñra soy-sopları DNA bere – ve qıyaslaylar», – dep qayd etti Ukrayına naziri, DNA ekspertizasınıñ nevbeti eki ayğa bar, dep qoştı.
Monastırskıy azat etilgen topraqlarda uquq qoruyıcılar işğalciler qurğan işkence yerleri tapıla ve andan keçken insanlarnıñ sayısı aytmaq şimdi imkânsız ola, dep qayd etti. «Harkiv vilâyetinde 23 işkence yeri tapıldı, bir dane Donetsk vilâyetinde ve üç dane Herson vilâyetinde», – dep bildirdi Monastırskiy.
Rusiye Ukrayınada vatandaşlarğa qarşı cinayetlerge ordusınıñ alâqasını red etmege devam ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
