Qırım ilhaqı vaqtında aq qorçalayıcılar 399 siyasiy mabüsni ve cinaiy davalar boyunca taqip etilgenlerni qayd etti, olardan 241-i qırımtatardır. Bunı Qırımtatar resurs merkezi bildire.
"Körgenimiz kibi, Qırımda repressiyalar toqtamay — işğalci akimiyet Rusiye işğaline razı olmağanlarğa qarşı davalarnı uydurmağa devam ete. Er afta Ukrayina tarafdarı olğan faaller, jurnalistler, din erbapları ve adiy vatandaşlar yaqalanıp, makeme etile", — dep aytıla haberde.
QRM-nde qayd etkenlerine köre, kütleviy tintüvler, hususan qırımtatarlarnı qorquzmaq içün sistematik usulğa çevirildi. Siyasiy mabüslerniñ sayısı ep arta, çünki Rusiye farqlı fikirde olğanlarnı bastırmaq içün repressiya usullarını qullana.
Aq qorçalayıcılarnıñ malümatına köre, taqip etilgenniñ statusına köre bu kategoriya 5 alt kategoriyadan ibaret:
- maküm etilgen ve cezahanede cezasını çekkenler (186, 108 qırımtatar)
- sıñırlav ya da sınav müddeti olğanlar (59, 28 qırımtatar)
- SİZO-da (61, 41 qırımtatar)
- azat etilgenler (58, 36 qırımtatar)
- taqip etilgenler (35, 28 qırımtatar).
Daa evel "KrımSOS" aq qorçalayıcı teşkilâtı, 2024 senesi Qırımda eñ azından 56 qırımlı Rusiye akimiyeti tarafından taqip etilgenini bildirgen edi. Bundan ğayrı, Rusiye quvetçileri yarımadada 45 qanunsız tintüv keçirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
