Rusiye kontrolindeki Aqmescitniñ Kiyev rayon mahkemesi işğal etilgen Qırımda Keriç (Qırım) köpründe patlav aqqında cinaiy davanıñ beş mabüsini tevqifli qaldırdı. Buñı mahkemeniñ matbuat hızmeti haber etti.
"Aqmescitniñ Kiyev rayon mahkemesiniñ qararı deñişmez qala, istinaf şikâyeti qanaatlendirilmedi. Oturış qapalı şekilde olıp keçti", - dep yazıla bildirmede.
Oktâbrniñ 13-nde Rusiye kontrolindeki Aqmescitniñ Kiyev rayon mahkemesi işğal etilgen Qırımda Keriç (Qırım) köpründe patlav aqqında cinaiy davanıñ beş mabüsini SİZOğa yolladı.
Oktâbrniñ 12-nde Rusiye FSBsi Keriç köpründe Ukrayına istihbaratınıñ yolbaşçısı Kırılo Budanov ola, dep bildirdi. Rusiye mahsus hızmetleri «terakt azırlağan» 12 insannı tapqan, sekizi, Rusiye FSBsiniñ malümatına köre, tutulğan eken, dep bildirdi.
Müessise malümatına köre, patlayıcı cihaz 22 tonnadan çoq 22 palletada çıtada saqlanğan edi. Avgustnıñ başında patlayıcı Odesa limanından Bulğaristan, Gürcistan ve Ermenistandan yollanıldı, dep bildirdi FSB. Müessise yük maşinasınıñ rentgen fotosı olğan fotoresimni derc etti: kuzoda qara şeyler körüne. Faqat ekspertler rentgendeki resim bam-başqa yük maşinasını köstere, dep qayd ete.
Eki mabüsniñ advokatları «İnterfaksqa» apis cezasını tasdıqladı, amma dava tafsilâtlarını izaatlamağa razı olmadı. «İnterfaks» öz menbalarına esaslanıp bildirgenine köre, laf Artem Azatyan, Georgiy Azatyan, Roman Solomko, Vladimir Zloba ve Artur Terçanân aqqında kete.
Oktâbrniñ 8-nde saba Qırım köpründe patlav oldı. Rusiye tahqiqatçılarınıñ versiyasına köre, yük maşinası patladı. Neticede eki maşina yolu zarar kördi, patlav sebebinden ya da aynı vaqıtta köpürniñ tren yolundan ketken yük treni yanıp başladı.
Rusiye prezidenti Vladimir Putin bu patlavnı «terakt» dep adlandırdı, onıñ icracıları ve sımarış etkenler Ukrayına mahsus hızmetleri ola. Rusiye Tahqiqat komiteti Rusiye Ceza kodeksiniñ 205-inci maddesine («Terrorizm») istinaden cinaiy dava açtı.
Ukrayına resmiy şahısları izaat bermey. Prezident ofisiniñ yolbaşçısı Mıhaylo Podolâk «Putinniñ şahsiy leyhasını» patlatuv – rusiyelilerniñ işi ve arbiy reberlikniñ FSBge qarşı ücümi ola, dep ayttı.
The New York Times gazetası «Ukrayınska pravda», UNIAN ve Washington Posttan soñ Ukrayına memurınıñ malümatına esaslanıp bildirgenine köre, ücümni Ukrayına mahsus hızmetleri teşkil etti. Olarnıñ versiyası – yük maşinasını patlatuvdır.
Resmiy şekilde köpürdeki patlav içün kimse mesüliyetini tanımadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
