Rusiye kontrolindeki Kefe şeer mahkemesinde Rusiye devlet qabaatlayıcısınıñ vekilleri qırımlı vatandaş jurnalisti ve emşire İrına Danılovıç içün 7 yıl apis cezası ve 60 biñ ruble miqdarında para cezası berilmesini talap etti, dep haber ete «Qırım esnası» aq qorçalayıcı teşkilâtı.
Rusiye devlet qabaatlayıcısınıñ temsilcisi Yuliya Matveyeva munaqaşada çıqışta bulunıp mabüsniñ qabaatı mahkeme tahqiqatı vaqtında bütünley isbatlandı, dep bildirdi.
İmaye, munaqaşa vaqtında şaatlarnıñ malümatında bir sıra zıt malümat bar, dava malümatında olğan bir sıra delil uyğun degil, açıq delil yoq ve Qırım polisiniñ hadimi olğan «şaatlardan» biriniñ yalan şaatlıq etkenini qayd etti.
Dekabrniñ 27-nde olğan mahkeme oturışuvında İrına Danılovıç yaramadı, mahkemege acele yardım çağırıldı.
İrına Danılovıçnıñ ükmü dekabrniñ 28-nde ilân etilmeli.
İrına Danılovıç mahkemede Rusiye uquq qoruyıcıları onı tutqanda işkencege oğrattı, dep bildirdi.
Şimdi Danılovıç patlayıcı madde ya da patlayıcı cihaz ile qanunsız areketlerden şübheli sayıla (Rusiye Ceza kodeksiniñ 222.1 maddesiniñ 1-inci qısmı). Berilgen malümatqa köre, Rusiye FSBsi İrına Danılovıçnı tibbiy inelernen patlayıcı cihaz azırlağanında qabaatladı.
Vаtandaş jurnalisti İrına Danılovıç aprelniñ 29-nda sabadan berli bağğa çıqmadı. Yaşağan evde onsız Rusiye FSB hadimleri tintüv keçirdi. Tintüv neticesinde Danılovıçnıñ ana-babasından bütün cep telefonları alındı ve bir qaç kün olar kimsege haber etip olamadı.
Qırım Muhtar Cumhuriyetiniñ prokuraturası İrına Danılovıçnıñ qanunsız tutuluvı ve tintüvlerinen bağlı cinaiy tahqiqat başlattı.
Ukrainanıñ cemaat teşkilâtları vatandaş jurnalisti İrına Danılovıçnı azat etmege talap etti.
İrına Danılovıç emşire olıp çalıştı ve içtimaiy ağlarda saifesi ve bir qaç bloger saifesi bar. Anda işğal etilgen yarımadadaki tibbiyet hadimleriniñ aqları ve sağlıq problemlerinen bağlı yazılar paylaşa.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
