Rusiye kontrolindeki Kefe şeer mahkemesinde noyabrniñ 30-nda Qırımda apiske alınğan emşire ve vatandaş jurnalisti İrına Danılovıçnıñ daa bir oturışuvı keçti. O, Rusiye uquq qoruyıcıları tarafından hırsızlanğan soñ işkencege oğratıldı, dep ayttı. Bu aqta «Qırım esnası» cemaat teşebbüsi haber ete.
Oturışuv vaqtında Danılovıç mahkemege aprelniñ 29-nda saba Köktebeldeki duraqta FSB hadimleri tarafından hırsızlandı, dep bildirdi. Onıñ qayd etkenine köre, ne o künü, ne kelecek afta devamında onı kimse patlayıcı cihaznı saqlağanında qabaatlamağan edi – bu vaqıt devamında onı Ukrayına mahsus hızmetleri ile bağlar aqqında sorğuğa çektiler. Sorğuda em maneviy basqı oldı, em işkence yapıldı. Danılovıçnıñ aytqanına köre, onı köteklep boğğanlar, uzun vaqıt ayaqyolğa barmağa bermey ediler.
Onıñ bildirgenine köre, bu vaqıt devamında onı Qırımdaki Rusiye FSB Baş idaresiniñ bina mağazında antisanitariya şaraitlerinde tutqanlar. Bir aftadan videoğa uquq qoruyıcılarğa bir iddiası yoq dep aytsa ve kerekli vesiqalarnı imzalasa, onı yiberirler, dep vade etken ediler.
Şimdi Danılovıç patlayıcı madde ya da patlayıcı cihaz ile qanunsız areketlerden şübheli sayıla (Rusiye Ceza kodeksiniñ 222.1 maddesiniñ 1-inci qısmı). Berilgen malümatqa köre, Rusiye FSBsi İrına Danılovıçnı tibbiy inelernen patlayıcı cihaz azırlağanında qabaatladı.
Qırımda apiske alınğan emşire ve vatandaş jurnalisti İrına Danılovıç SİZOdan yazğan mektübinde Rusiye uquq qoruyıcılarınıñ oña qarşı basqısı arttı, dep bildirdi.
Hatırlatamız, Qırım.Aqiqat mühbiri advokat Ayder Azamatovnıñ malümatına esaslanıp bildirgenine köre, İrına Danılovıç hırsızlanğan soñ poligrafqa oturtıldı, Qırımdaki Rusiye FSBsiniñ idaresinde sekiz kün tutuldı. Onı bir şey gizlese, «ormanğa çıqarırlar», dep qorquzdılar. Bu vaqıt devamında Daniloviçke künde bir kere aş berildi. Rusiye FSBsinde tutuluvınıñ soñunda hırsızlanğan vatandaş jurnalistine azat etilecek dep boş kâğıtlar imzalaması içün berildi.
Vаtandaş jurnalisti İrına Danılovıç aprelniñ 29-nda sabadan berli bağğa çıqmadı. Yaşağan evde onsız Rusiye FSB hadimleri tintüv keçirdi. Tintüv neticesinde Danılovıçnıñ ana-babasından bütün cep telefonları alındı ve bir qaç kün olar kimsege haber etip olamadı.
Qırım Muhtar Cumhuriyetiniñ prokuraturası İrına Danılovıçnıñ qanunsız tutuluvı ve tintüvlerinen bağlı cinaiy tahqiqat başlattı.
Ukrainanıñ cemaat teşkilâtları vatandaş jurnalisti İrına Danılovıçnı azat etmege talap etti.
İrına Danılovıç emşire olıp çalıştı ve içtimaiy ağlarda saifesi ve bir qaç bloger saifesi bar. Anda işğal etilgen yarımadadaki tibbiyet hadimleriniñ aqları ve sağlıq problemlerinen bağlı yazılar paylaşa.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
