Qırımlı vatandaş jurnalist ve faal İrına Danılovıç koloniyada kerekli ilâc alıp olamay. Bu ilâcsız baş ve qulaq ağrıları ola. Bu aqta babası Bronıslav Danılovıç Qırım.Aqiqat mühbirine bildirdi.
Onıñ malümatına köre, koloniyada tek salı ve cumaaqşamı künleri 90 daqqa içinde ilâc berile. Bu vaqıt içinde bir qaç yüz mabüsten tek 20-30 kişi ala bile.
«Nevbetten yer alıp, ilâc almaq imkânı içün hastalar arasında ara-sıra qavğa-kötek ola. İrına böyle şeylerde iştirak etmey ve bir qaç aydan berli ekimler yazğan ve biz yollağan ilâclarını alıp olamay. Bu sadizm ola», – dep bildirdi Danılovıç.
O, koloniyanıñ yaramay sanitar-gigiyenik şaraitlerini de qayd etti. Sıcaq suv yoq ve biñlernen mabüs qadın yuvunıp olamay. Bundan ğayrı, savutlar yahşı temizlenmey i mabüslerniñ hastalıqları arta, dep qayd ete Danılovıç.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
