Amerika Birleşken Devletleri, İsrail ve İran eki aftalıq barışıq añlaşmasını imzaladılar. ABD prezidenti Donald Trump ultimatum müddetiniñ bitmesine bir saat qalğanda İran Hormoz boğazını açsa, oña qarşı darbelerni toqtatmağa azır olğanını bildirdi. Trumpnıñ aytqanına köre, ABD arbiy maqsadlarına "irişti ve ziyadesini aldı".
"İrandan 10 maddelik teklif aldıq ve onı muzakere içün çalışacaq bir temel dep sayamız. Keçmişniñ aman-aman bütün davalı meseleleri ABD ve İran arasında añlaşıldı, amma eki aftalıq müddet añlaşma işini bitirmege imkân berecek", – dep yazdı o.
İrannıñ Yüksek milliy telükesizlik şurası İran "büyük ğalebe qazandı" ve ABDge 10 maddelik planını "qabul ettirdi". Fars agentligi derc etken plan Hormoz boğazınıñ İran tarafından kontrol etilmesi, ABDniñ regiondaki bütün bazalardan arbiyleriniñ çıqarıluvı, "tirenüv köçerine" qarşı bütün arbiy areketler toqtatılması, İran zararınıñ tazmin etilmesi, bütün sanktsiyalarnıñ lâğu etilmesi, çetelde İran aktivleriniñ buzlatıluvdan çıqarıluvı ve bu maddelerniñ BM Telükesizlik şurası qararında qayd etilmesini közde tuta.
İran Tış işler naziri Abbas Aragçi X içtimaiy ağında İran akimiyeti eki aftalıq barışıqqa azır, dep tasdıqladı.
"Eki afta devamında İran silâlı quvetleri ile koordinatsiyada Hormoz boğazından keçüv serbest olacaq", – dep qoştı o.
İsrail baş naziri Binyamin Netanyahunıñ temsilciligi Trumpnıñ "İran boğaznı açıp, ABD, İsrail ve region memleketlerine ücüm etmeycek" şartınen İranğa qarşı darbelerni toqtatmaq qararına qoltuttı. Qayd etilgenine köre, eki aftalıq barışıq Lübnanğa tesir etmeycek.
Trump barışıq razılığı aqqında bildirgen soñ Trurh Socialda "bütün dünyada barışıq içün müim bir kün", dep ayttı.
"Amerika Birleşken Devletleri Hormoz boğazında gemilerniñ keçmesine yardım etecek. Pozitiv areketler çoq olacaq! Büyük paralar qazanılacaq. İran ğayrıdan tiklev esnasına başlap olur. Er şeyniñ yolunda olğanından emin olmaq içün çeşit yükler yüklep, yaqınlarda olacaqmız. Eminim, öyle de olacaq", – dep qayd etti o, "bu Yaqın Şarqnıñ Altın asrı ola bile", dep qayd etip.
Muzakereler Pakistan baş naziri Şehbaz Şarif ve qara ordusınıñ komandanı, feldmarşal Asim Münirniñ aracılığınen keçti.
Axios mühbiri Barak Ravid vaziyetten haberi olğan eki menbağa esaslanıp, ABD ve İran arasında cenk toqtatıluvınen bağlı muzakerelerniñ ilk raundı aprelniñ 10-nda İslamabadda olacaqtır, dep yazdı.