Rusiye quvetleri işğal altındaki Qırımnıñ İçki rayonında faal bir şekilde okop qaza. Bu aqta Qırımtatar resurs merkeziniñ idare yolbaşçısı, Qırımtatar Milliy Meclisiniñ azası Eskender Bariyev «Ğromadske radio» intervyüsında ayttı.
«Olar Qırımnıñ mesken yerleri perimetrinde okop qaza. Tünevin berilgen malümatqa köre, Qırımnıñ şarqında, meselâ, İçki rayonında faal bir şekilde okop qazalar», – dep tarif etti Bariyev.
Aynı vaqıtta Bariyevniñ qayd etkenine köre, Qırımda okoplar qazılğanına baqmadan, Rusiye kütleviy haber vastaları Rusiye prezidenti Vladimir Putinniñ ziyareti vastasınen «Qırım pek telükesiz bir yer», dep köstermege tırışa.
Martnıñ 16-nda Ukrayına Mudafaa nazirliginiñ Baş istihbarat idaresiniñ vekili Vadım Skıbıtskıy Ukrayına umummilliy telemarafonı yayınında Mudafaa nazirliginiñ Baş istihbarat idaresi Rusiye ordusınıñ işğal altındaki Qırımda yapqanlarını taqip ete, dep bildirdi.
Martnıñ 10-nda Qırımnıñ Rusiye yolbaşçısı Sergey Aksenov Qırımda mudafaa hattı qurula, dep tarif etti.
Noyabrniñ başında RBK-Ukrayına neşiri OSINT-mütehassısı Bencamin Pittetniñ malümatına esaslanıp, Rusiye ordusı şimaliy Qırımda okop qazıp başladı, hususan Ermeni Bazar şeeri yanında imaye inşaatları qayd etildi, dep bildirgen edi.
2022 senesi noyabrniñ 29-nda Qırımdan Rusiye Devlet dumasınıñ deputatı Leonid Babaşov Aqmescit rayonınıñ Şkolnoye qasabasında Rusiye ordusınıñ ihtiyacları içün tanklarğa qarşı qoralar işlep çıqarıla, dep bildirgen edi.
Noyabrniñ 2-nde Ukrayına prezidenti Volodımır Zelenskıy çeh televideniyesine intervyü berip, Ukrayına ğalebe qazanğan soñ Qırımğa ketmek niyeti aqqında ayttı. Ne vaqıt olacaq degen sualge Zelenskıy kesen-kes «qışta degil» dep, Ukrayına Rusiye ile cenkte yazğa yaqın ğalebe qazanır, dep ümütlerini bildirdi.
Bıltır oktâbrniñ 1-nde Ukrayına istihbaratınıñ yolbaşçısı Kırılo Budanov Natalâ Moseyçukqa intervyü berip, Ukrayına Silâlı quvetleri 2023 senesi baariniñ soñuna qadar Qırımğa kirer, dep bildirdi.
Ukrayına prezidenti ofisiniñ yolbaşçı mesleatçısı Mıhaylo Podolâk Qırım sakinlerini sığınaqlarnı kontrol etip, Ukrayınanıñ «işğalden azat etüv tedbirleri» sebebinden yedek suv azırlamağa çağırdı. Podolâk, Ukrayına prezidentiniñ ofisi Qırım işğalden azat etilecek vaqıtqa sakinler içün tahliye marşrutlarını azırlay, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
