19 yılğa azatlıqtan marum etilgen qırımlı arap tili filologı İsmet İbragimovnıñ tişleri baqılmalı. Erkekni aşqazan ağrıları da raatsızlay, dep haber ete «Qırım birdemligi» ömür arqadaşı Raziye Mustafayevanıñ malümatına esaslanıp.
Qadınnıñ aytqanına köre, keçken afta o, Rusiye Federatsiyasınıñ Ulyanovsk vilâyetiniñ Dimitrovgrad apishanesinde balalarınen beraber aqayını ziyaret ettiler. Dört yıl devamında bu ilk uzun körüşüvleri oldı.
«Em balalar, em babaları içün pek zor oldı», – dep qayd etti Raziye Mustafayeva.
İbragimovnıñ ömür arqadaşına bildirgenine köre, SİZOda tutuv müddeti ğayrıdan esaplanğan soñ apishanede beş yıl yerine eki yıl qalacaq. Qalğan müddetni ise sert rejimli koloniyada keçirecek.
2020 senesi iyülniñ 7-nde Rusiye uquq qoruyıcıları yedi qırımtatarını tuttı: Emil Ziyadinov, İsmet İbragimov, Zekirya Muratov, Vadim Bektemirov, Alim Sufyanov, Seyran Hayretdinov mahkemede apiske alındı ve Aqmescit tahqiqat izolâtorına avuştırıldı. 1-inci derece saqatı olğan Aleksandr Sizikov ev apsine alındı. Tutulğanlar Rusiyede yasaqlanğan «Hizb ut-Tahrir» diniy teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
