Ukraina prezidentiniñ Qırım Muhtar Cumhuriyetindeki sabıq temsilcisi İzet Gdanov noyabrniñ 18-nde Rusiye quvetçileri Qırımda ana-babasınıñ evini tintti, dep bildirdi.
«Saba saat 6:00-da Qırımda ana-babamnıñ evine «OMON» keldi, yük maşinalarınen keldiler, qoradan atladılar ve FSB açıq qapudan kirdi («efsal bölük», atlamaylar), tintüv keçirdiler, er şey qoya bileler, aynı vaqıtta er yerde ediler, özleri ve şaatları, silâ qıdırğanlar», – dep bildirdi Gdanov Facebookta.
Onıñ aytqanına köre, FSB hadimleri tuvğanlarına «mahkeme qararı bar», dep bildirdi.
«Bir saniye kösterip, oqumağa bermediler, anam ve qız qardaşımnı (FSBge zorlap alıp ketecekler dep) soy-soplarına qarşı şaatlıq etmeyceklerine dair bir şey imzalamağa zorladılar. Cep telefonımnıñ nomerasını aldılar, sanki bilmeyler», – dep qoştı Gdanov.
Onıñ QIRIM.News neşirine bildirgenine köre, işğal altındaki Qırımda onı «Rusiyege zarar ketirgeninde ve Rusiye Federatsiyasınıñ topraq bütünligini bozğanında» qabaatlaylar.
«Maña qarşı bir qaç sahte cinaiy dava açıldı, daa prezidentniñ Qırımdaki temsilcisi vazifesinde olğanım vaqıt başlandı. Bunıñ bir neticesi olmaycaq. Qırımnı qaytarmaq içün küreşecekmiz ve bizni qorquzıp olamazlar», – dedi Gdanov.
FSB ve Rusiye tahqiqat organlarınıñ vekilleri Gdanovnıñ ana-babası yaşağan evde keçirilgen tintüv aqqında malümatnı tefsir etmey.
Gdanov, 2018 senesi dekabr ayından başlap 2019 senesi iyünniñ 25-ne qadar Ukraina prezidentiniñ Qırım Muhtar Cumhuriyetindeki Daimiy temsilcisi vazifelerini eda etken edi.
