İyün ayında Rusiye quvetçileri Qırımda Rusiye ordusını itibardan tüşürgenleri içün eñ azından 22 insannı mesüliyetke çektiler. Bu malümatnı Ukrayina prezidentiniñ QMC Daimiy temsilciligi bildire.
Müessisede qayd etkenlerine köre, Rusiye Federatsiyasınıñ Ukrayinağa istilâsı başlağanından berli bu madde boyunca Qırımda 847 insan mesüliyetke çekildi.
"İyülniñ başında 847 dava qayd etildi. İyün ayı devamında işğalciler eñ azından 22 insannı Ukrayinağa qoltutqan areketleri ve lafları içün qanunsız surette mesüliyetke çekti", – dep aytıla haberde.
Rusiye Federatsiyasına tam miqyaslı istilâ başlağan soñ, Rusiye ordusınıñ "diskreditatsiyası" aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayina cenki aqqında malümat tarqatqanları ve Kremlniñ noqta-i nazarına zıt kelgen er angi fikir bildirgenleri içün taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, 2023 senesi Rusiye Federatsiyasında ve Ukrayinanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi, açılğan davalarnıñ sayısı ise 70,6% arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
