Rusiye kontrolindeki Aqyarnıñ vaqtınca yolbaşçısı olğan Mihail Razvojayevniñ bildirgenine köre, iyünniñ 1-nden itibaren turistler şeer kirişlerinde koronavirus testini yaptıra bilecek.
«Biz COVID-19 tedqiqini bermege teklif etemiz. İyünniñ 1-nden başlap bunı üç keçiş noqtasında teşkil etmege azırmız», – dep bildire Razvojayevniñ aytqanlarını TASS agentligi.
Onıñ aytqanına köre, bundan soñ insan test neticesi kelgenine qadar şeerge kirgende bildirgen adreste qalmalı. Koronavirus hastaları çoq olğan yerlerden Aqyarğa kelgenler içün kiriş qaideleri sert olacaq – koronavirus olmağanına dair vesiqa talap etilecek.
Aqyarda mayısnıñ 28-nde saba bir yañı COVID-19 hastası qayd etildi. Keçken künü Qırımda 6 yañı koronavirus hastası qayd etildi. Böylece, Qırımda 361 yañı koronavirus hastası qayd etildi. 26-sı çetelden keldi, 74 kişi qomşu Rusiyeden keldi. 11 insan vefat etti. Aqyarda 161 COVID-19 hastası bar, üç kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
