İyülde Qırım mahkemeleri, Rusiye ordusında askerlik yapmaqtan vazgeçken qırımlılarğa qarşı Rusiye Cinaiy Kodeksiniñ 328 maddesine köre 5 üküm çıqardı. Qırım uquq qoruyıcı gruppası bildirgenine köre, qırımlılarğa qarşı eñ azında 69 böyle dava açıldı.
Uquq qoruyıcılarnıñ malümatına köre, 2019 senesi bu maddege binaen umumen 20 cinaiy dava açıldı.
Aqyarda yerli sakin Rusiye ordusında hızmet etmekten vazgeçkeninde qabaatlana. "Komsomolskya pravda" bildirgeni kibi, 20 yaşındaki Gleb Şçerbakov "siyasiy sebepler" içün askerlik yapmaqtan red etti.
Kyiv Rusiyeden işğal etilgen Qırım sakinlerini silâlı quvetlerine çağıruvını toqtatmasını talap ete. QMC prokuraturası qırımlılarnı Rusiye ordusında hızmet etüv içün celpname alğanda telefon ya da elektron poçta vastasınen muracaat etmege rica ete.
Ukrainadaki BM insan aqları monitoring missiyası bildirgenine köre, 2017 senesi eñ az 4800 Qırım sakini Rusiye silâlı quvetlerine çağırıldı. OSCE ABD işleri vaqtınca vekâletlisi Garri Kamiannıñ malümatına köre, 2018 senesi 5600 qırımlı Rusiye ordusına çağırıldı.
Qırım aq qorçalayıcı gruppasınıñ malümatına köre, Rusiyeniñ Qırım işğali başlağanından berli Rusiye 15 biñ qırımlını askerlikke çağırdı.
