Rusiye Federatsiyasınıñ «İvan Hurs» istihbarat gemisi deñiz dronlarınıñ ücümine oğradı, dep bildire «Rıbar» Telegram kanalı. Rusiye kütleviy haber vastaları, bu kanal Rusiye uquq qoruyıcılarına ait, dep bildire.
Saba saat 5:30-larda İstanbul boğazını keçken soñ olğan eken.
Rusiye deñizcileri darbeni qaytardı, gemi zarar körmedi, dep haber etile.
Qırımnıñ Rusiye akimiyeti ya da Rusiye Federatsiyasınıñ Arbiy deñiz quvetleriniñ vekilleri malümatnı resmiy şekilde izaatlamağan edi. Qırım.Aqiqat muarririyeti bu malümatnı tez tasdıqlap olamay.
«İvan Hurs» gemisi – 18280 leyhasınıñ istihbarat bağ gemisidir. Gemi bağnı temin ete, radioistihbarat ve radioelektron küreş keçire, radiosignallarını tapa, flotnı idare ete, raketalarğa qarşı mudafaa sistemalarını taqip ete.
2022 senesi aprel ayında Rusiye Qara deñiz flotunıñ flagmanı «Moskva» gvardiya raketa kreyseri battı. Rusiye gemisi, tahminlerge köre, «Neptun» Ukrayına raketalarınıñ darbesinden çıqqan büyük yanğından soñ battı.
«Moskva» gemisi Odesa vilâyetindeki Zmiyınıy adasında olğan operatsiyada iştirak etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
