Bazarertesi künü, iyül 29-ında meşur deñiz ressamı İvan Ayvazovskiyniñ doğğan kününden 202 yıl ola. Bu kün ilhaq etilgen Qırımda bayram merasimlerini keçirecek olalar.
Hususan, Aqmescit ava limanında sergi açacaq olalar, anda onıñ resimleriniñ reproduktsiyaları, onıñ talebeleriniñ resimleri ve Aqmescit bediiy müzeyinden izdeşleriniñ eserlerini numayış etecekler. Sergi çerçivesinde, Ayvazovskiyniñ ve onıñ talebesiniñ resimleri qumda tasvir etilecek.
İvan Ayvazovskiy 1817 senesi iyül 29-ında Kefede doğdı. Deñiz mevzusından ğayrı o, resim sanatınıñ başqa janrlarında da çalışa edi: animalizm ve portretten başlap, diniy ve mifologiya ressamlığına qadar. Ayvazovskiy 6 biñden ziyade eserniñ müellifi ola. Onıñ resimleri dünya boyu müzey ve şahsiy toplamlarnı yaraştıra.
Mayısta, Rusiye Baş Devlet Ekspertizası, Kefede İvan Ayvazovskiy adına resim galereyasınıñ rekonstruktsiyasını maqul kördi, dep bildirilgen edi.
Şimdilik galereya toplamında 13 biñden ziyade eksponat bar.
2017 senesi sentâbrde "Qırım cemiyet palatası", Kefedeki Ayvazovskiy adına galereyanı Qırım Medeniyet Nazirliginiñ idaresine keçirmege qarar berdi. Amma "Kafa" matbuatı bildirgeni kibi, şeerliler buña itiraz etti. Neticede, şeer akimiyeti, bu meselede daa soñ qarar alınmadı, dep bildirdi.
2019 senesi aprel 15-inde Qırımnıñ rusiyeli başı Sergey Aksönov, İvan Ayvazovskiyniñ adına resim galereyası ve onıñ qız qardaşınıñ Kefedeki evi şeer mülkiyetinde qalacaq, dep bildirdi.
