İtaliyada bir künde koronavirus yuqunçından 525 hasta vefat etti. Bu martnıñ 19-ndan berli eñ az ölüm oldı.
İtaliyada vefat etkenlerniñ sayısı 15 887 oldı, dep haber ete Azatlıq Radiosı.
Bundan ğayrı, ekimlerniñ malümatına köre, ekinci künden berli İtaliyada reanimatsiyada olğanlarnıñ sayısı eksile.
İtaliyadaki qırğınlıq vaqtında hastalanğanlarnıñ sayısı vefat etkenlernen ve tüzelgenlernen beraber 129 000 insan oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
