“Qara deñiz ve qadimiy Ukraina haritalarında Qırım” sergisi Fano italyan şeerinde açıldı dep bildire Qırım.Aqiqat mühbiri.
Sergide Qırım yarıadası ve Qara deñiz resimlerinen XVI-XVIII asırlarnıñ 20-den çoq coğrafik haritası kösterilgen, olarnıñ episi yerli nemse tili ocası Aldo Tennedininiñ şahsiy toplamıdır. Siyrek rastkelgen haritalar toplamında qırqqa yaqın nümüne bar. O zamanları avropa haritacıları ukrain topraqlarını nasıl körgenleri kösterilgen.
“Menim toplamımda çoqusı nemse, flamand ve italya mütehassıslarnıñ haritaları toplağan. O tarihiy devriniñ haritaları pek dülber, sanat eseri kibi. Bu haritalar kitap kibi - zemaneviy Ukrainanıñ qadimiy tarihini ögrenmege yardımcı ola”, - dep ikâye etti Qırım.Aqiqatqa toplayıcı.
Şahsiy toplamınıñ ilk nümünelerini Aldo Tennedini, 15 yıl evel, Ukrainağa birinci sefer kelgende, alğan edi. Toplayıcı Qırım ve Qara deñiz yalısını begendi ve bundan soñ Ukrainanıñ tamam bu qısmınen haritalarnı toplap başladı.
Fanodan oca, qadimiy coğrafik haritalarnıñ çoqusını Almaniya antikvar tükânlarında satın ala edi. Bir haritanıñ fiyatı, Aldo Tennedininiñ aytqanına köre, 300-1000 avro ola bile.
Ukrainağa bağışlanğan sergini keçirmege, yerli akimiyet ve İtaliyada Ukrain elçiligi yardım etti.
