Soñki vaqıtları yañı koronavirus hastaları ve koronavirus yuqunçından ölümler çoq qayd etilgen İtaliya akimiyeti qırğınlıq tarqaluvına qarşı tedbirlerni quvetleştirdi.
İtaliya ükümetiniñ başı Giuseppe Conte martnıñ 21-nde aqşam yaşayış içün kerek olğan ve qapatıluvı mümkün olmağan müessise ve teşkilâtlardan ğayrı er yerni qapatmağa emir etti, dep bildirdi Azatlıq Radiosı.
Laf azıq tükânları, aphane, bank ve poçtalar aqqında kete. Cemaat naqliyatı, ketirüv hızmetleri, ilk ihtiyac mallarnı yapqan müessiseler çalışacaq. Baş nazirniñ aytqanına köre, İtaliya qırğınlıqnen küreşmek içün «istisal motorını yavaşlata», amma tolusınen toqtatmay. Konte, «fevqulâde iqtisadiy vaziyet» aqqında bildirdi.
Daa evel kirsetilgen umummilliy karantin qaideleri quvetleştirile – parklar qapalı olacaq, insanlar evlerde qalmalı.
Soñki künde İtaliyada koronavirus qurbanlarınıñ sayısı aman-aman 20 fayız arttı – 793 insan öldi. İtaliyada qırğınlıq başlağanından berli 4825 kişi can berdi. Bu aqta martnıñ 21-nde İtaliya akimiyeti bildirdi.
Martnıñ 21-nde aqşam İtaliyada hastalanğan 53,5 biñ kişi qayd etildi. Soñki kün içinde 6557 yañı hasta qayd etildi. Bu malümatnı Reuters agentligi bildire.
Avropa Birligi, bücet qaidelerinden vaqtınca vazgeçmege qarar aldı. Böylece, İtaliyanıñ qırğınlıqtan zarar körgen iqtisadiyatqa qoltutmaq içün qoşma para yollamağa fırsatı olacaq. Karantin bir aftadan berli devam ete, küçük ve orta biznes müessiseleri qapalı, turistik saa işsiz qaldı.
İqtisadiyatçılarnıñ tahminlerine köre, kerilev olacaq ve işsizlik seviyesi artacaq.
Hatırlatamız, martnıñ 21-nde dünyada 305010 COVID-19 koronavirus hastası resmiy şekilde tasdıqlandı. Bir künde 1607 insan öldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
