İsviçre Qırımnıñ işğali içün Rusiyege qarşı sanktsiyalar cedvelini keñişletti. Bu cedvelge sekiz insan qoşuldı, olarnıñ arasında Qırım ve Aqyar boyunca Rusiye FSB yolbaşçısı Leonid Mihaylük. Bunıñ aqqında memleketniñ İqtisadiyat üzre Devlet kâtibiyetniñ saytanda yayınlanğan beyanatta yazıla.
Leonid Mihaylüktan ğayrı sanktsiyalar altına Qırım ve Aqyar boyunca Rusiye Tahqiqat komiteti ofisiniñ reberi Vladimir Terentyev, Moskvanıñ nezaretinde olğan Qırım qadıları Viktor Mojelânskiy, Galina Redko, Mihail Belousov, Andrey Dolgopolov, tahqiqatçı Magomed Magomedov ve prokuror Yevgeniy Kölpikov oğradı.
Olar Ukrainanıñ topraq bütünligini, suverenitetini ve mustaqilligini bozğan ve tehdit etken siyaset ve areketlerni faal desteklegeni içün qara cedvelge kirsetildiler.
Sanktsiyalar sebebinden Qırım yarımadasına dair ukrain akimiyet organları tarafından berilgen sertifikat olmadan mallarnıñ ital etilüvi yasaq. Bundan ğayrı bir sıra isviçre mallarınıñ ihrac etilüvi yasaq.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
