İsveçiya Tış işler nazirligi memleket akimiyeti tarafından casuslıq yapqanından şübheli sayılğan Rusiye diplomatınıñ memleketten sürgün etilmesini talap etti. Bu aqta Dagens Nyheter gazetası menbalarına esaslanıp bildire. Tış işler nazirligine Rusiyeniñ Stokgolm elçisi Viktor Tatarintsev çağırıldı. Ondan casuslıqtan şübheli sayılğan kişini sürgün etmesi talap etildi. Bu aqta Azatlıq Radiosınıñ rus bürosı haber ete.
İsveçiya nazirliginiñ vekili Patrik Nilssonnıñ bildirgenine köre, Rusiye elçisi diplomatlardan biriniñ faaliyeti sebebinden çağırılğan edi.
Daa evel haber etilgeni kibi, fevralniñ 26-nda telükesizlik politsiyası Stokgolmda qanunsız istihbarat faaliyetinden şübheli sayılğan kişini yaqaladı. Onıñ adı aydınlatılmay.
İlk malümatqa köre, yaqalanğan kişi diplomatik vazifede çalışqan Rusiye istihbaratçısı tarafından celp etilgen edi. İsveçiyada şübheli kişi çetel istihbaratı içün meraqlı olğan informatsion tehnologiyalarnen oğraşqan edi. Stokgolm faaliyeti 2017 senesi başlağanını red etmey.
