İsveçiya parlamentiniñ mebusı Mariya Nilson ukrayinlerni Mustaqillik künü ile hayırladı ve Rusiye tarafından işğal etilgen Qırımda kene Ukrayina bayrağı yelpirecegine ümüt etkenini bildirdi.
İsveçiya Liberal fırqasınıñ da kâtibi olğan Nilson avgustnıñ 24-nde Facebook saifesinde ukrayin tilinde oquğan hayırlav videosını yayınladı.
"Qıymetli ukrayinler! Sizni Mustaqillik künü munasebeti ile hayırlayım! Bugün siz memleketiñizniñ mustaqilligi oğrunda küreşesiz. Serbestlikni ne qadar sevgeniñizni bütün dünyağa kösterdiñiz. Buça, İrpin, Müriupolni iç bir vaqıt unutmamız. Ukrayina bayrağı kene Qırım, Donetsk ve Luganskta yelpirecegine inanamız", - dedi o.
Avgustnıñ 24-nde Ukrayina Mustaqillik kününi qayd ete.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
