Cumaertesi künü, noyabrniñ 23-nde, İstanbulda Türkiye, Ukraina, Romaniya Qırım sanayıcı iş adamları Dernegi (TURKSİD) açıldı, dep bildire Qırım.Aqiqat mühbiri.
Tedbirde qırımtatar halqınıñ lideri Mustafa Cemilev, Qırımtatar Milliy Meclisiniñ reisi Refat Çubarov, Ukrainanıñ Türkiye elçisi Andriy Sıbiğa, Ukrainanıñ İstanbul Baş konsulı Oleksandr Ğaman, TURKSİD yolbaşçısı Ertan Baştuhan ve Türkiye, Ukraina ve Romaniyanıñ qırımtatar iş adamları iştirak etti.
Tedbir teşkilâtçılarınıñ aytqanına köre, Dernek qırımtatar diasporası yaşağan regionlarda iqtisadiy işbirligi ve koordinatsiya içün, ticaret, medeniyet, ilim ve sanatqa qoltutmaq içün quruldı.
Qırımtatar Milliy Meclisiniñ reisi Refat Çubarov açılış merasiminde iştirak etkenini ilân etti.
TURKSİD 2019 senesi oktâbrniñ 1-nde işine başladı. Dernekniñ merkezi İstanbulda olacaq.
Oktâbrniñ ortasında Dernek Kyivde şubesi açılğanını ilân etti. TURKSİD Ukraina vekili iş adamı İsmet Yüksel oldı. Dernek yolbaşçısı Ertan Baştuhannıñ aytqanına köre, ileride Poloniya, Bulğaristan ve Baltiya memleketlerinde şubelerniñ açılması beklenile.
