Link açıqlığı

İstanbulda Qırımdaki insan aq-uquqlarınen bağlı vaziyetni muzakere etecekler


Şarqiy Avropanıñ tanılmağan ve qısmen tanılğan devletleriniñ uquq qorçalayıcıları İstanbulda toplaşıp, tecribesinen paylaşacaq ve işbirlik yapmaq imkânlarını belgileycek olalar.

İnsan aqları boyunca Halqara federatsiya (FIDH) «Şarqiy Avropa davalı subyetlerinde insan aqlarını qoruv imkânları» regional seminarını teşkil etti. Tedbirde Azerbaycan, Ermenistan, Gurcistan, Moldova, Rusiye ve Ukraina uquq qorçalayıcıları ve cemaat erbapları, em de Avropa Şurası ve İnsan aqları Avropa mahkemesiniñ vekilleri iştirak ete. Seminar iştirakçileri Abhaziya, Qırım, Dağlıq Qarabağ, Pridnestrovye ve Cenübiy Osetiyada üküm sürgen vaziyetni muzakere etecekler.

FIDH prezidenti Souhayr Belhassen çıqışta bulunır eken, Şarqiy Avropa davalı subyektleriniñ umumiy ealisi 3,5 million adamnı teşkil etkenini seslendirdi. Bu adamlarnıñ aqları ve serbestligine riayet etüv problemleri aynıdır. İstanbul seminarınıñ vazifesi – Şarqiy Avropa davalı subyektlerinde çalışqan cemaat erbaplarınıñ tecribesine esaslanıp, uquq qorçalayıcı faaliyetniñ strategiyasını muzakere etmektir. Tedbir soñunda meraqlanğan devletlerniñ akimiyetlerine tevsiyeler yollanılacaq.

İnsan aqları boyunca Halqara federatsiya (FIDH) – insan aqlarına riayet etmegenlerni mesülietke çeküv ve aq-uquqları bozulğan insanlarnı qoruv areketidir. Baş ofisi Parijde yerleşken federatsiya erkânına 100-den ziyade memleketten 164 milliy teşkilât kirmekte.
XS
SM
MD
LG