Link açıqlığı

Saatnıñ esas haberi

İstanbulda Qırım işğaline qarşı miting keçirildi


İstanbulnıñ Beyazıt meydanında fevralniñ 23-nde Qırımnıñ Rusiye işğaline qarşı narazılıq aktsiyası olıp keçti. Bu aqta Ukrainanıñ İstanbul Baş konsullığı haber etti.

Tedbir yarımada işğaliniñ altıncı yılına bağışlandı.

«6 yıldan berli semetdeşlerimiz qıyın vaziyette buluna – urf-adetlerini kütip, dinini kütip, ana tilinde oqup olamaylar. Qırımda yaşağan qırımtatarlar millet mensüpligi ve dinleri sebebinden taqip etile», – dep aytıla haberde.

Mitingde qırımtatar dernekleri, diger türk cemiyetleri ve Ukraina medeniyet derneginiñ vekilleri iştirak etti.

Olarnıñ qollarında yazuvlı şiarlar bar edi: «Tünevin Stalin, bugün Putin», «Kremlniñ cinayetini toqtat, hırsızlağanını qaytar», «Qırımtatarlar teslim olmaycaq».

Bıltır Türkiyeniñ paytahtı Ankarada martnıñ 2-nde Qırım işğaliniñ 5-inci yılına bağışlanğan miting keçirilgen edi.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG