İstanbulda cumaertesi künü, noyabrniñ 23-nde, qırımtatar halqınıñ lideri Mustafa Cemilev 76 yaşını toldurğanı munasebetinen sayğı aqşamı ötkerildi, dep bildire Qırım.Aqiqat mühbiri.
Musafirler arasında Mustafa Cemilev ve ömür arqadaşı Safinar Cemileva, Qırımtatar Milliy Meclisiniñ reisi Refat Çubarov, Üsküdar Belediye yolbaşçısı Hilmi Türkmen, Düzce Belediye yolbaşçısı Faruk Özlü, Emel Qırım Vaqfınıñ reisi Zafer Karatay, Ukrainanıñ Türkiye elçisi Andriy Sıbiğa ve Türkiyedeki qırımtatar dernekleriniñ reisleri bar edi.
Düzce Belediye yolbaşçısı Faruk Özlü çıqışta bulunıp, şeerde Mustafa Cemilev adına park açmağa planlaştırıla, dep bildirdi.
Qırımtatar halqınıñ lideri tedbir teşkilâtçılarına teşekkürler bildirip, Qırım işğali aqqında hatırlattı.
«Qırım kene işğal etildi. Bir qaç yıl evel televizorda arqadaşlarıma seslenim dedim ki: Qırım yarımadası işğalden qurtarılğanına qadar kimseniñ ölmege aqqı yoqtır. Ne olsa olsun, Qırım serbest olğanına qadar, hayatta qalmağa tırışacam. Ve mıtlaqa Qırımdan bu pis rus işğalcilerniñ quvulmasını körecekmiz», – dedi Cemilev.
Sayğı aqşamı çerçivesinde Mustafa Cemilevniñ ayatı ve qırımtatar halqınıñ aqları oğrunda küreşine bağışlanğan fotoresimler sergisi açıldı, «Qırımoğlu: bir halqnıñ küreşi» vesiqalı filminiñ parçaları kösterildi, qırımtatar yırları icra etildi ve oyunlar töşeldi.
Noyabrniñ 13-nde qırımtatar halqınıñ lideri Mustafa Cemilev 76 yaşını toldurdı. Beş yıldan berli o, Qırımğa kirip olamay. İşğalden soñ Rusiye yarımadağa kirişini yasaqlağan edi. Yasaq 2019 senesi aprelniñ 19-nda bitti, amma Cemilev Qırımğa qaytıp olamay.
