Türkiyede ve Avropada yolcular sayısına köre eñ büyük ava limanı olğan İstanbuldaki Atatürk halqara ava limanı cumaertesi künü uçuşlarnıñ qabul etilüvini toqtata. Turkish Airlines Türkiye milliy ava şirketi İstanbulnıñ yañı halqara ava limanına avuştırılacaq, dep bildire Azatlıq Radiosınıñ rus bürosı.
İstanbulnıñ Avropa tarafında, şeer merkezinden şimal-ğarbinde, Qara deñizge yaqın yerleşken yañı ava limanına «büyük köçüv» cuma künü başlandı.
Atatürk ava limanından yañı ava limanına 50 biñ tonnalıq donatma 700 yük maşinasınen taşındı. Turkish Airlinesniñ 300 uçağı da anda avuştırıldı.
Eki ava limanı 12 saatqa qapatılğan edi, cumaertesi künü üyle vaqtında yañı halqara ava limanı Turkish Airlinesniñ esas ava limanı olaraq işke başladı.
İlk uçuş Türkiyeniñ paytahtı Ankarağa kerçekleştirildi. Türk ava yollarınıñ eski ava limanından kerçekleştirilgen soñki uçuşı ise Singapur oldı.
İstanbulnıñ yañı halqara ava limanı 2018 senesi oktâbrniñ 29-nda – Mustafa Kemal Atatürk qurğan Türkiye Cumhuriyetiniñ 95 yılında açıldı. Yañı ava limanı Atatürkniñ adını taşımaycaq, onıñ adı İstanbul halqara ava limanı olacaq.
Prezident Recep Tayyip Erdoğannıñ teşebbüsi ile başlatılğan qurucılıqnıñ fiyatı 11 milliard dollar oldı. Türkiye akimiyetiniñ fikirince, yañı ava limanı dünyada yolcularnıñ sayısına köre eñ büyük ava limanı olacaq. O, yılda 150 million yolcuğa hızmet ete bile. 2028 senesine qadar 6 uçuv-qonuv yolaqnı işke tüşürmege ve yolcularnıñ sayısını yılda 200 millionğa arttırmağa planlaştırıla.
