Rusiye Ukrainağa tam ücüm etse, Ukraina akimiyeti Türkiye akimiyetinden İstanbul ve Çanakkale boğazlarını Rusiye gemileri içün qapatmasını rica etecek, dep bildirdi Reuterske Ukrainanıñ Türkiye Cumhuriyeti elçisi Vasıl Bodnar.
Ukraina sıñırlarında bulunğan Rusiye arbiy gemileri aqqında sualge cevap bergen Bodnar bu gemiler Kiyv içün «pek telükeli» ola, dep ayttı.
«Ukrainağa qarşı keniş arbiy ücüm ya da cenk areketleri başlasa – cenk tek kerçek degil, resmiy olsa – Türkiye ükümetinden tecavuzcı devlet içün Qara deñiz boğazlarını qapatuv imkânlarını baqmasını rica etecekmiz», – dedi elçi.
Rusiye Qara deñizge Şimaliy ve Baltıq flotlarınıñ altı büyük desant gemisini yolladı. Rusiye Mudafaa nazirligi gemiler talimlerde beraber iştirak etecek, dep bildirdi.
Ukraina Tış işler nazirligi Rusiyeniñ arbiy-deñiz talimleri manaçığınen «Qara ve Azaq deñizleriniñ bir qısmını ve Keriç boğazını blok etmek» qararına qarşı «qararlı bir narazılıq» bildirdi.
Qara deñiz boğazlarını qullanuv tertibi 1936 senesi İsviçrede imzalanğan Montrö Şartnamesine bağlıdır.
