Aprelniñ 19-nda saba İsrail İranğa qarşı ava darbesini endirip, aprelniñ 14-nde yapılğan kütleviy ücümge cevap berdi. FARS İran yarım resmiy agentliginiñ malümatına köre, üç patlav İsfahan vilâyetinde arbiy baza yanında eşitildi.
İranda Tehran, Şiraz ve İsfahan avalimanlarından vatandaş aviatsiyasınıñ seferleri toqtatıldı.
İsrailniñ ABDge bildirgenine köre, cevabı sıñırlı olacaq. Özek maqsadı yoq edi, dep bildirdi Amerika kütleviy haber vastalarını adı aytılmağan Amerika memurı.
İsrail mudafaa ordusı İranğa qarşı darbeni izaatlamadı.
Aprelniñ 14-ne keçer gecesi İran İsrailge ücüm etti. Bu aprelniñ birinde Dimaşqta İran konsullığına ait binağa qarşı raketa darbesine cevap oldı. İsrailge qarşı 170 uçucısız ve 150 qanatlı ve ballistik raketa atıldı. Aman-aman episi İsrail, ABD ve Ürdün arbiyleri tarafından tüşürildi. İsrail resmiy malümatına köre, ücüm vaqtında memleketniñ cenübinde Nevatim arbiy bazasına biraz zarar ketirildi. İsrail ordusı iranlılarnıñ esas maqsadı bu baza edi, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
