İsrail mayısnıñ 2-nde – Ekinci cian cenkinde natsistler tarafından öldürilgen 6 million yeudiy hatırasına – Holokost qurbanlarını añmaqta. Bu aqta Azatlıq Radiosı bildire.
Qudusnıñ «Yad Vaşem» hatıra kompleksindeki tedbir mayısnıñ 1-nde aqşam ötkerildi.
Hatıra tedbirleri dünya boyunca yerleşken diniy obyektlerge yapılğan ücümlerniñ sayısı artqanda keçirile. Amerikanıñ Kaliforniâ ştatında aprelniñ 27-nde sinagogada ateş açıldı, bunıñ neticesinde bir insan elâk oldı ve daa üçü yaralandı.
İsrail baş naziri Binyami Netanyahu Kaliforniâdaki ücüm antisemitizm artqanınıñ soñki işareti ola, dep ayttı.
İsrail prezidenti Reuven Rivlin Avropadaki antisemitizm, onıñ aytqanına köre, «immigratsiya dalğaları, iqtisadiy buhranlar ve insanlarnıñ siyasiy reberlerden közü qaytqanı sebebinden kene başını kötere», dep qayd etti.
İsrailde Holokost qurbanlarını añma kününde eglence müessiseleri qapatıldı, tele ve radiostantsiyaları vesiqalı filmlerni köstere ve facia qurbanlarınen intervyülarnı yayınlamaqta.
