İsrail BM qararını tenqit etip, onı «ayıp» dep adlandırdı

İsrail, Gazzede İsrail ordusı ve «Hamas» arasında «acele, qaviy ve turğun gumanitar barışıqqa» çağırğan BM qararını tenqit etti.

Ürdün teklif etken qararğa 120 memleket qoltuttı. 14 devlet qarşı rey berdi, İsrail, ABD, Avstriya, Macaristan, Hırvatistan, Çeh Cumhuriyeti, Gvatemala, Paragmay ve Tınç okeannıñ altı memleketi. Daa 45 memleket bitaraf qaldı, bir qaç memleket rey berüvde iştirak etmedi.

Rey berüvden soñ İsrailniñ BM vekili Gilad Erdan Birleşken Milletlerniñ bir tamçı qanuniyligi yoq dep, teşkilâtnı kelecek cinayetlerni temin etmege tırışqanında qabaatladı. Onıñ aytqanına köre, «Hamasnen» bir muzakere ve munaqaşa olamaz, İsrail ise bir şey yapmayıp oturmaycaq.

Erdan bildirgenine köre, zorbalıq bitmesini istegen er kes «Hamasnı» silâ qaldırıp, teslim olmağa ve bütün reinelerni qaytarmağa çağırmalı. Oktâbrniñ 7-nde İsrailge qarşı ücümde zapt etilgen eki yüzden çoq reine tutula.

İsrail Tış işler naziri Eli Koen qararnı «ayıp» dep, «İsrail «Hamasnı» dünya natsistler ve «İslâm devletini» yoq etkeni kibi yoq etmege niyetlene», dep bildirdi.

Qararnıñ uquqiy küçü yoq, lâkin BM cenk areketlerine ilk sefer cevap berdi. Daa evel BM Telükesizlik şurası dört kere iç bir arekette bir qararğa kelip olamadı.