Rusiye kontrolindeki Aqmescitniñ Kiyev rayon mahkemesinde FSB tahqiqatınıñ «Hizb ut-Tahrir davasınıñ» mabüsi İsmet İbragimovnıñ sıñırlav müddetini uzatuv muracaatı baqıldı. O, 2021 senesi martnıñ 2-ne qadar apiste qalacaq. Bu aqta advokatı Ayder Azamatov «Qırım birdemligine» tarif etti.
Mahkeme açıq oldı, salonğa soy-sopları kirsetildi. İmaye bir sıra muracaat berdi, hususan, özüni Ukraina vatandaşı dep sayğan İbragimovğa qarşı Dördünci Jeneva şartnamesiniñ qullanıluvı aqqında.
Azamatovnıñ aytqanına köre, tahqiqatçı sıñırlav tedbiri üç ayğa uzatılmalı, dep israr etti, çünki «rusçadan qırımtatarcağa tercimanlar kerek olğan bu davanıñ eki diger mabüsine qarşı bazı ekspertizalar yapılacaq. Bundan ğayrı «dava pek qıyın sayıla ve dava tahqiqatını dekabrniñ 2-ne qadar bitirmege imkân yoq».
İmayeci, müvekkiline qarşı tahqiqat tedbirlerini bitti, bundan soñ bazı ekspertizalar keçirilemez, dep qayd etti.
«Biz qarşı çıqtıq ve İbragimovğa qarşı tahqiqat tedbirleri noyabrniñ 19-nda endi yekünlendi, dep qayd ettik, tahqiqatçı Ceza-protsessual kodeksiniñ 215 maddesine istinaden ilk tahqiqat bitti dep ayttı ve cinaiy dava malümatlarını ögrenüv imkânını berdi. Yani tahqiqatçı asılında olmağan bir ikâye uydurdı», – dep izaatladı advokat.
Bundan ğayrı, Azamatov, İbragimov bu cinaiy davanıñ yekâne qabaatlanğan şahsı ola, dep qayd etti.
«Tahqiqat kimligini bilip olamağan eki şahıs bar. Qabaatlanğan daa eki insan ve bu insanlarğa terciman kerek olğanını tahqiqatçı özü de bilmey, añlağanıma köre», – dep tüşüne Ayder Azamatov.
İsmet İbragimov iyülniñ 7-nde Aqmescit rayonınıñ Kurtsı qasabasında tutuldı. O künü daa altı qırımtatarı tutuldı. İbragimov Rusiyede ve işğal etilgen Qırımda yasaqlanğan «Hizb ut-Tahrir» faaliyetini teşkil etkeninde qabaatlana.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
