Qırımnıñ İslâm Terek rayonında Mercedes maşinası direkke urulıp ekige bölündi. Bu aqta Qırımdaki Rusiye Fevqulâde vaziyetler nazirligi idaresiniñ matbuat hızmeti haber ete.
«Qırım Fevqulâde vaziyetler nazirliginiñ hadimleri qaza yerine kelip, ekisi bala olğan 3 insan bulunğan Mercedes maşinasınıñ aydavcısı idare etemeyip, ışıq direkine urulğanını ögrendi», – dep aytıla haberde.
Müessise malümatına köre, 2011 senesi doğğan eki bala çeşit derece yaralar alıp, Kefe bala şeer hastahanesine alındı.
Daa evel İslâm Terek rayonında «VAZ-2019» ve Ford Transit yük maşinası çatışması neticesinde bir kişi yaralandı.
Qurtarıcılar Qırımda ciddiy yol qazalarınıñ sayısı arttı, dep bildirgen edi. Qırımda 2019 senesiniñ ilk üç ayında keçken senege baqqanda bir buçuq qat ziyade aydavcı mesüliyetke çekildi.
