«İslâm devleti» ekstremist gruppası 321 insannıñ ölümine ve beş yüzden ziyade insannıñ yaralanmasına sebep olğan patlavlarnıñ mesüliyetini öz boynuna aldı. Azatlıq Radiosınıñ bildirgenine köre, buña dair mesac terrorcılarnen bağlı «Amak» agentliginde derc etildi.
«İD» bir de bir delil ketirmedi.
Şri Lanka prezidenti Maitripala Sirisena aprelniñ 23-nde gece başlağan fevqulâde vaziyetni ilân etti. Bu adım politsiya ve arbiylerge şübheli insanlarnı mahkeme qararı olmasa da, yaqalamağa ve sorğuğa çekmege imkân berecek. Prezidentniñ ofisi haber etkenine köre, o, ücüm etkenlerniñ çetel bağlarını taqip etmek içün halqara yardım isteycek.
Ükümet politsiya kilselerge yapıla bilecek ücümler aqqında bilip, olarnıñ ögüni alamadı, dep bildirdi.
Politsiyanıñ daa evel haber etkenine köre, Şri Lankadaki patlavlarğa alâqası bar olğanından şübheli sayılğan 24 insan yaqalandı.
Ükümetniñ fikirince, üç kilse ve üç musafirhanege canlı bombalar ücüm etti.
On yıl evelsi mında vatandaş cenki bitken soñ bu ücüm adada kerçekleştirilgen eñ büyük zorbalıq oldı, dep aytalar.
Politsiyanıñ malümatına köre, elâk olğanlar arasında – 35 çetel vatandaşı, ABD, Büyük Britaniya, Qıtay, Felemenk, Portugaliya vatandaşları.
