Qırım yarımadasınıñ işğalden azat etilmesinden soñ Qırımnıñ suv anbarlarını idare etüv planı Ukrayina Facility avropalı programması yardımınen maliye etile bile. Bu aqta EU4Environment leyhasınıñ eksperti Aleksey Yaroşeviç "Ukrinform"da Qırımnıñ suv anbarlarını idare etüv planını muzakere etilgende bildirdi.
"Şimdi işğalden azat etilgen Qırımnıñ özenler havuzını idare etüv planını amelge keçirüv yollarını muzakere etemiz ve ükümet tarafından Ukrayina Facility programması boyunca ğayrıdan tiklev, rekonstruktsiya ve modernizatsiya planına kirsetilmesini bekleymiz. Teşebbüsimizniñ tam miqdarda maliye etilmesini bekleymiz ve ümüt etemiz, çünki suv anbarlarımıznıñ vaziyeti, şu cümleden işğalden azat etilgen Qırımda da, - bu Ukrayinanıñ Avropa integratsiyasınıñ müim bir qısmıdır, – dedi Yarosheviç.
Ukrainanıñ resmiy malümatına köre, Qırım özenleriniñ havuzında 331 özen, 19 göl, 411 yerüstü suv massivi ve daa 10 yerastı suv massivi bar. Muzakere vaqtında EU4Environment leyhasınıñ eksperti Yekaterina Mudraya, Qırım işğalden qurtarılğan soñ bu malümatlar yañartılacaq, dep bildirdi.
"Ebet, Ukrayina malümatnıñ yañartılmasına ve suv vaziyetiniñ nezaret etilmesine muhtac <... >. Amma Qırım - Ukrayinadır, yarımada işğalden azat etilgen soñ mütehassıslarımız bütün kerekli işlerni yapacaqlar", – dep bildirdi Mudraya.
Fevralniñ soñunda Avropa Birligi Şurası Ukrayinanıñ 4 yıllıq 50 mlrd yevro yardım programmasını tasdıqladı. Qayd etilgenine köre, pakette 2021-2027 seneleri içün çoq yıllıq maliye çerçivesinde deñişmeler kirsetilüvi, em de Ukrayina Facilitesi ve Avropa içün strategik tehnologiyalar platforması (STEP) teşkil etilüvi aqqında qaideler bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
