Ukrainanıñ baş nazir muavini ve vaqtınca işğal etilgen topraqlarnıñ reintegratsiya meseleleri naziri Oleksiy Reznikov Ukraina akimiyeti işğal etilgen Qırımğa ne içün suv bermegenini tarif etti.
Bu aqta o, «Ukraina 24» telekanalında bildirdi, dep haber ete Azatlıq Radiosı.
«Qırımda suv doğru qullanılsa, ealige yete. Esas Ukrainadan almağa istegen suvları birinciden arbiy ihtiyacları içün kerek, çünki Qırım bütünley askeriyleştirile, asker sayısı arttırıla – bu bir «uçaq gemisi». Bunı tam bilemiz, boş oturmaymız, ve istihbaratımız, inanıñız, yahşı çalışa. Qayda ne olğanını ve bu suv olarğa ne içün kerek olğanını yahşı bilemiz. Yani – işğalcige suv bermeycekmiz», – dep işandırdı Reznikov.
Ukraina prezidenti Volodımır Zelenskıynıñ Qırım Muhtar Cumhuriyeti ve Aqyardaki daimiy vekili Anton Korınevıç Ukraina akimiyetiniñ Qırımğa suv berüv meselesinde fikri deñişmey, dep bildirdi.
Donbastaki vaziyetni çezüv üç taraflı bağ gruppasındaki Ukraina eyyetiniñ spikeri, Ukraina prezidentiniñ ofis yolbaşçısınıñ mesleatçısı Oleksiy Arestoviçniñ «Telegraf» neşirine bergen intervyüsında Rusiye «pek ciddiy seviyede yol berse», Qırımğa suv berüv meselesinde Ukraina akimiyetiniñ fikri deñişe bile, dep bildirdi – «Minsk añlaşmaları yerine ketirilecek, Donbastan ordu çıqarılacaq, Lugansk ve Donetsk vilâyetleriniñ ayrı rayonları Ukraina şartlarınen qaytarılacaq».
Ukraina Tış işler naziri Dmıtro Kuleba Azatlıq Radiosına intervyü berip, Dnipro suvı Qırımğa ancaq yarımada işğali bitken soñ berilecek, dep aytqan edi.
Ukrainanıñ BM monitoring missiyası Qırım yarımadasınıñ işğali sebebinden «Rusiye Qırımda insanlarnıñ suv teminatından mesüliyetli ola», dep israr ete.
Qırım akimiyeti, Şimaliy-Qırım kanalı qapatılğan soñ «yarımadağa suv qamaçavı ketirgen zarar sebebinden» Ukrainağa qarşı dava açtırmağa azırlana, dep bildirdi. Qırımnıñ Rusiye parlamentiniñ reisi Vladimir Konstantinov halqara qurulışlarğa muracaat etmezden evel Rusiye mahkemelerine dava berilecek, dep bildirdi.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
