Rusiye kontrolindeki Qırımnıñ Qurman rayon makemesi Rusiye makemesi tarafından 19 yılğa azatlıqtan marum etilgen qırımtatar faali ve aq qorçalayıcısı Riza İzetovnıñ anasınıñ onı evge yaqın olğan koloniyağa avuştırma talabını red etti. Bu aqta "Qırım birdemligi" cemaat birleşmesine advokat Nazim Şeyhmambetov bildirdi.
Onıñ aytqanına köre, makemede imaye, Nadiye İzetovanıñ — qırımlınıñ 71 yaşında anası, — onkologiya hastalığı bar ve oğlunı ziyaret etip olamay, dep qayd etti. Şimdi o, Rusiye Federatsiyasınıñ Sah Cumhuriyetiniñ 1-nci apishanesinde buluna — bu İzetovlarnıñ Qırımdaki yaşağan yerinden doquz biñ kilometrden ziyade mesafedir.
İmaye, qadınnıñ oğlunı ziyaret etmek içün maddiy imkânları olmağanını tasdiqlağan vesiqalarnı da berdi.
"Bu genç, sağlam insan içün de qolay iş degil, er kes (böyle bir seyaatnı — QA) yapıp olamay", — dep qayd etti Nazim Şeyhmambetov.
Keçken sene oktâbr ayında Riza İzetov Qırımdan doquz biñ kilometr uzaqlığında yerleşken Sah Cumhuriyetiniñ 1-nci tüzetüv koloniyasına avuştırılğanı aqqında haber etilgen edi.
2023 senesi saban ayınıñ 10-nda Rostov-na-Donu Cenübiy okrugınıñ arbiy mahkemesi Remzi Bekirov, Riza İzetov, Raim Ayvazov, Farhod Bazarov ve Şaban Umerovnıñ ükümlerini çıqardı. Olarnı Rusiye Federatsiyası Ceza kodeksiniñ 205.5 maddesiniñ 1-inci qısmına istinaden ("Terror teşkilâtınıñ faaliyetini teşkil etüv") qabaatlağanlar. Qalğanları – Rusiye Federatsiyası Ceza kodeksiniñ 205.5 maddesiniñ 2-nci qısmına istinaden ("Terror teşkilâtınıñ faaliyetinde iştirak etüv"). Dava mabüsleri Rusiye Federatsiyası Ceza kodeksiniñ 30-ıncı maddesiniñ 1-inci qısmı ve 278-inci maddesine istinaden ("Akimiyetni zorbalıqnen zapt etüv azırlığı") qabaatlandı.
2019 senesi saban ayınıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan "Hizb ut-Tahrir" teşkilâtında iştirak etkeninde qabaatlanğan 24 faal tutulğan edi. 2019 senesi saban ayınıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ "Qırım birdemligi" faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
"Memorial" aq qorçalayıcı merkezi 2019 senesi saban ayınıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
