İşğal etilgen Qırımda Bağçasaray rayonınıñ Topçıköy köyündeki caminiñ imamı, 19 yaşındaki Nasıba Saidovanıñ babası Sadık Urinbayevge qarşı Rusiye quvetçileri memuriy dava açtı ve mahkemege berdi. Bu aqta "Gratı" Ukrayina aq qorçalayıcı neşri haber ete.
Vesiqada qayd etilgenine köre, dava Sadıq Urinbayev ve onıñ qadını Dinara İyupovanıñ qızını azat etmek içün yapqan faaliyetleri sebebinden açıldı. Nasiba Saidova, Rusiyede yasaq etilgen, amma Ukrayinada ve diger memleketlerde serbest faaliyet köstergen İslâm siyasiy firqası Hizb ut-Tahrirde iştirak etkeninde qabaatlanıp, 11 aydan berli Aqmescit SİZO-sında apiste buluna.
Polis hadimleri İlk küzniñ 2-nde Urinbayevge qarşı protokol tizdiler. Vesiqanıñ 4-nci qısmına binaen Rusiye Federatsiyasınıñ Memuriy cinayetler kodeksiniñ 5.26 maddesinde qayd etilgenine köre, İlk yaznıñ 5-nde cuma künü "mında mecburiy cemaat namazı"nı Qırım ve Sevastopol şeeri musulmanları diniy idaresiniñ attestasiyasından keçkenini tasdiqlağan şeadetnamesi olmağanda qılğan.
İmam protokolnı imzalağan, amma añlatmasında vesiqa ile razı olmağanını ve öz faaliyetini qanunsız saymağanı içün qabaatını tanımaycağını bildirgen. Urinbayevge 5 biñden 50 biñ rublege qadar memuriy para cezası berile bile. Bu, imamlıqta çoq yıllıq ameliyatı devamında onıñ ilk memuriy davasıdır. O, Qırım musulmanları içün Qırımda diniy merasimlerni 1994 senesinden berli keçire.
Bu, diniy saa vekilleriniñ ilk taqip etilüvi degil.
2026 senesi Quralayda Avropa insan aqları mahkemesi, Rusiye akimiyeti imamnı devlet tarafından desteklengen diniy teşkilâtlardan tış ibadet etkeni içün mesüliyetke çekip, Avropa insan aqları şartnamesiniñ 9-ıncı maddesinde kefil etilgen din serbestligi aqqını bozdı, dep tanıdı ve oña 7,5 biñ yevro tazminat berdi.