İrlandiya Senatı Rusiyeniñ Ukrayinadaki areketlerini genotsid kibi tanığan qararnı qabul etti. Bunı İrlandiya pralamentiniñ Yuqarı palatasınıñ spikeri Mark Deyli öz Twitter saifesinde haber etti.
Vesiqada Rusiyeniñ Ukrayinağa istilâsı esassız areket olğanı ve bunıñ halqara uquqqa zıt olğanı bildirilir.
"Rusiye arbiyleriniñ areketleri BMT-nıñ genotsid cinayetiniñ qarşısınıñ alınması ve cezalandırılması aqqında Şartnamesinde belgilengen genotsid kriteriylerine uyğun kele", -dep yazıla qararda.
Senat dünya memleketlerini Rusiyege qarşı sanktsiyalarnı quvetleştirmege ve satuvdan elde etilgen kelirler "Ukrayina halqına qarşı Rusiyeniñ arbiy maşınası"nıñ paranen temin etilmesine yönetilgen Rusiye nefti, gazı ve kömüriniñ itâlatını toqtatmaq içün işni devam etmege çağırdı.
Kanada, Letoniya, Estoniya, Litvaniya ve Çehiya parlamentleri de Rusiyeniñ Ukrayinadaki areketlerini genotsid kibi tanıdı.
Bundan ğayrı Litvaniya parlamenti Rusiyeni "terrorcılıqnı paranen temin etken devlet" adlandırdı.
Aprelniñ ortasında ABD prezidenti Joseph Biden Rusiye prezidenti Vladimir Putinniñ Ukrayinağa qarşı siyasetini genotsid adlandırdı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
