Yanvarniñ 11-nde aqşam yüzlernen insan Tehranda Amir Kabir universiteti ve Tehran universitetiniñ binaları ögünde narazılıq aktsiyalarına çıqtı, dep bildire Azatlıq Radiosınıñ/Farda Radiosınıñ İran hızmeti.
İştirakçilerniñ büyük qısmı eki aliy oquv yurtunıñ studentleri edi, olar 176 insan elâk olğan «Ukraina halqara ava yollarınıñ» uçaq qazasında qabaatlı olğanlarnı cezalamağa talap etti, dep bildire «Nastoyaşçeye vremâ».
Şaatlarnıñ bildirgenine köre, narazılıq bildirgenler şiarlarnı seslendire: «Yalancılar, yalancılar!», «İslâm inqilâbı qaravulı, masharalıq, memleketimizni raat qaldırıñız» ve «Diktator ketsin!».
Qayd etilgenine köre, narazılıq bildirgenlerni quvet qurulışlarınıñ vekilleri mototsikllernen sarıp aldı, bazı blogerlerniñ içtimaiy ağlarda bildirgenine köre, politsiyanen çatışmalar oldı, quvetçiler insanlarnı dağıtmaq içün sersemletme granatalarını qullandı.
Irna İran agentliginiñ haber etkenine köre, narazılıq bildirgenler elâk olğan uçaq yolcularınıñ hatırasına çıraq ve çeçekler ketire. Agentlikniñ jurnalistleri politsiyanen çatışma olğanını bildirmey.
İran, Tehran yaqınlarında tüşken «Ukraina halqara ava yollarınıñ» uçağı arbiyler tarafından «yañlışlıqnen» tüşürilgenini tanıdı. Resmiy Tehran malümatına köre, uçaq İslâm inqilâbı qaravul korpusınıñ müim obyektlerinden biri tarafına aylanğanda «duşman nişanı» olaraq köründi. Arbiyler, ABD ile kerginleşken munasebetler sebebinden «eñ yüksek seviyede azır edi», bu «insan hatasına» yol açtı. İslâm inqilâbı qaravullar korpusı Tehranda Ukraina uçağınıñ tüşürilmesinden «bütün mesüliyetni» öz boynuna aldı.
Ukraina prezidenti Volodımır Zelenskıy, İran akimiyeti qaza «qabaatını tolusınen almalı», dep israr ete.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı. İran akimiyeti 176 insan elâk olğan Ukraina uçağı tüşürilgenine dair versiyanı inkâr etken edi.
