Tehranda Ukraina uçağı Rusiyede yapılğan «Tor» zenit-raketa komplekslerinden urulması mümkün edi. Bu İranğa yollanılğan Ukraina mütehassısları baqqan versiyalarından biri ola, dep bildirdi Ukraina Milliy telükesizlik ve mudafaa şurasınıñ kâtibi Oleksiy Danılov Azatlıq Radiosına.
«Baqqan versiyalarımızdan biri ola. Yedi versiyamız bar – dördü açıq, üç şimdilik qapalı ola. Bu vaziyette yapılması kerek bütün tedqiqatlar keçirilgen soñ qarar ala bilemiz», – dedi Danılov.
MTMŞ kâtibiniñ aytqanına köre, «bu ekspertler memleketimizde olğan eñ eyi mütehassıs ola, olar Donetsk vilâyetinde uçaqnı tüşürgen Rusiyege ait «Buk» meselelerinen oğraşqan edi».
«Amma mında yarış yoq, MTMŞ – piar agentligi degil, biz delillernen, malümatnen çalışamız. Belli bir versiyanı isbatlağan ya da inkâr etken şeyler olsa, sizni haberdar etecekmiz. Bugünki künde niaiy versiya yoq», – dep qayd etti Danılov.
İran tahqiqatı, Tehrandan çıqıp tüşken «Ukraina halqara ava yolları» ava şirketiniñ Boeing 737-800NG uçağı tüşmezden evel keri aylandı, dep bildirdi.
«Ava limanı alanını terk etmek içün başta ğarpqa ketken uçaq çıqqan problemden soñ sağdan qayttı ve qaza vaqtında ava limanına yöneldi», – dep bildirdi İran vatandaş aviatsiyası teşkilâtı öz saytında.
«Uçaq 8000 fut (2400 metr) yükseklikke köterilgen soñ radarlarnıñ ekranlarından coyuldı. Uçucı hucur bir şey aqqında radiodan haber etmedi. Şaatlarnıñ aytqanına köre, uçaqta pek tez yanıp başlağan alev körüngen edi», – dep qoştı teşkilât, tahqiqatnıñ ilk neticeleri aqqında bildirip.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Ukraina Tış işler naziri Vadım Prıstayko, İrannen Ukraina uçağınıñ qazasını tahqiq etüv ve onıñ sebeplerini ögrenüvde eki memleketniñ tahqiqat gruppalarınıñ koordinatsiyası aqqında añlaştı, dep bildirdi.
Ukrainada yanvarniñ 9-nda İrandaki uçaq qazası sebebinden matem künü olaraq ilân etildi.
