İran Tehranda MAU uçağınıñ qazasında qabaatlılarnı apis etkenini haber etti, bildire Azatlıq Radiosı.
"Keñiş tahqiqat keçirildi ve bazı şahışlar apis etildi", - aytıp berdi İran mahkeme akimiyetiniñ vekili.
İran prezidenti Hasan Ruhani, itibarlı mahkemeci ve onlarca ekspertler ile mahsus mahkeme teşkil etilmek kerek, dep ayttı.
O qazağa "bağışlanmaz accı" hata dedi.
"Mesuliyetlik birden çoq adamdadır", - dedi o ve "er kes cezalanmaq kerek" dep qoştı.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı. İran akimiyeti 176 insan elâk olğan Ukraina uçağı tüşürilgenine dair versiyanı inkâr etken edi.
