İran yanvarniñ 8-nde saba Tehran civarında tüşken Ukraina halqara ava yollarına ait uçaqnıñ «qara qutularını» Ukraina mütehassıslarına açtı. Bu aqta Ukraina Tış işler naziri Vadım Prıstayko yanvarniñ 10-nda brifingde bildirdi.
«Biz em uçaq parçalarını, em de qaza yerini kördik. Şimdi taqımımızğa «qara qutular» da açıldı, ve bizler yaqın vaqıtta muzakerelerniñ rekonstruktsiyasını başlatmağa planlaştıramız. Bizler Tehran ava limanında uçucılarnı idare etüv merkezinden dispetçerlerniñ ve uçucılamıznıñ (laqırdı) qaydlarını aldıq. Bu malümat şimdilik talil etile», – dep bildirdi Ukraina Tış işler naziri, dep haber ete «Nastoyaşçeye vremâ».
Prıstaykovnıñ aytqanına köre, uçaq qazasında elâk olğanlarnıñ bütün tuvğanlarından DNA örnekleri alındı.
Uçaq qazasını tedqiq etken Ukraina eyyetiniñ erkânına 50 kişi kire.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Ukraina Tış işler naziri Vadım Prıstayko, İrannen Ukraina uçağınıñ qazasını tahqiq etüv ve onıñ sebeplerini ögrenüvde eki memleketniñ tahqiqat gruppalarınıñ koordinatsiyası aqqında añlaştı, dep bildirdi.
Ukrainada yanvarniñ 9-nda İrandaki uçaq qazası sebebinden matem künü olaraq ilân etildi.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı.
İran akimiyeti 176 insan elâk olğan Ukraina uçağı tüşürilgenine dair versiyanı inkâr ete.
