İran «İsrailniñ cezalanması Yaqın Şarqtaki kerginlikniñ devam etmesine mania olmağa yardım etecek», amma Tehranda terroristik dep tanılğan «Hamas» filistin gruppirovkasınıñ siyasiy lideri İsmail Haniyanıñ öldürilüvinden soñ yüksek seviyege çıqqan kerginlikniñ artmasını istemey, dep bildirdi.
Gazzedeki cenk daa keniş regional zıddiyetke çevirile bile kibi qorqular İran ve ittifaqdaşı, Washington terroristik dep tanığan Lübnandaki «Hezbolla», İran İsrailni qabaatlağan Tehran ve Beyrutta ölüm sebebi olğan darbeler sebebinden intiqam almağa vade etken soñ arttı.
İsrail baş naziri Benyamin Netanyahu İran ve ittifaqdaşlarını memleketine qarşı ücümden saqındırıp, İsrail «İrannıñ yamanlıq köçerine yaqın çoq cebeli cenkte» buluna, dep bildirdi.
«Biz İrannıñ halqara uquq çerçivesinde istilâcını cezalamağa aqqı bar, dep tüşünemiz… İran telükesizligini temin etmek içün halqara temeller esasında aqqını qullanıp, ciddiy ve toqtatacaq tedbirler alacaq», – dep bildirdi İran Tış işler nazirliginiñ spikeri Naser Kanaani avgustnıñ 5-nde Tehranda, dep bildire İslâm inqilâbı bekçileri korpusınen bağlı Tasnim haber agentligi.
«İran istilâcı ceza alsa, istiqrar olacaq, dep inana», – dep qoştı o.
İsrail İrannıñ paytahtında Haniyanıñ öldürilüv mesüliyetini almadı.
Kanaani bildirgenine köre, halqara toplulıq, hususan Birleşken Devletler, regionda istiqrarnı saqlamağa yardım etip olamadı.
Bir kün evelsi ABD mudafaa naziri Lloyd Austin Tehran ücüm etse, Washington İsrailge yardım eter, dep söz berdi.
Rusiye devlet kütleviy haber vastalarınıñ malümatına köre, avgustnıñ 5-nde Rusiye Telükesizlik şurasınıñ kâtibi Sergey Şoygu bir afta evelsi ant etken İran prezidenti Masud Pezeşkian ve İran vekillerinen körüşmek içün Tehranğa iş ziyaretinen keldi.
Bütün dünya kerginlikni toqtatmağa çağıra, Tehran Haniyanıñ öldürilüvi sebebinden İslâm memleketleri teşkilâtınıñ acele toplaşuvını keçirmege çağırdı. 57 memleketten ibaret gruppa, şu cümleden İsrail qomşuları, avgustnıñ 7-nde körüşmege añlaştı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
