Kyivde aprelniñ 22-nde faaller «İnsanlarnı degil de, tereklerni oturtıñız» aktsiyasını ötkerip, tahminen 100 terek oturttı. Olarnıñ üstüne Rusiye ve ilhaq etilgen Qırım apishanelerinde tutulğan ukrainalılarnıñ adları ile kâğıtlar asıldı.
Faal Yelena Yeviçniñ Qırım.Aqiqatqa bildirgenine köre, aktsiya tesadufen keçirildi.
«24 tal fidanımız bar edi. Bu simvolik bayramda – Tal bazarı kününde – tek tereklerni oturtmağa degil de, müim bir şey, misal içün, cenk esiri deñizciler aqqında hatırlatmaq kerek. Şimdi evde olmağan, apayları, anaları, balalarınıñ yanında olamağan insanlar içün pek qasevetlenemiz. Qanunsız şekilde apiske alınğanlar evge qaytqanda olarnı beklegenimizni ve olarnı terekler beklegenini körsinler isteymiz», – dep ayttı faal.
Kyiv şeer şurasınıñ deputat yardımcısı Olga Stelmah qızıl emen, yüke ve tal oturtıldı, dep bildirdi. Onıñ aytqanına köre, yañı alleyanıñ alanı 40 yüz metr kâre topraqnı ala.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız şekilde tuta. Olarnıñ sırasına 2018 senesi noyabrniñ soñunda Qara deñiz yalısında zapt etilgen 24 ukrainalı deñizci ve Donbastaki esirler kirmey.
